Controleteam multidisciplinario: 30 di mei 2023

Riba 30 di mei 2023 e Controleteam Multidisciplinario (controladornan di Departamento di Asuntonan Economico y Departamento di Salud publico, acompaña pa agentenan policial di KPA) a eherce un control riba supermercadonan den area di Sanicolas. A controla diferente supermercadonan riba cumplimento cu e prijsnan maximo stipula pa gobierno riba productonan di canasta basico, indicacion di prijs, permiso di negoshi, venta di alcohol,  higiena, fecha di vencemento di productonan y carchi di salud. Na mes momento a atende cu supermercadonan riba imcumplimento cu e prijsnan maximo stipula pa gobierno y productonan c unan fecha a vence.

E maneho di indicacion di prijs ta obliga tur negoshi pa tin indicacion di prijs pa producto y/of servicio claramente visibel y legibel. Prijs por ta indica riba e producto of pa un grupo di producto riba shelf. E prijs mester ta indica den Florin Arubano. Adicional na esaki, por pone e equivalente den otro valuta.

E lista completo di productonan di canasta basico cu nan prijs maximo vigente ta disponibel riba e website www.deaci.aw, y tambe riba e APP ‘Control di Prijs’. Pa mas informacion por bishita e website menciona pa keda informa di tur e publicacionnan di Departamento di Asuntonan Economico. Cualkier keho of irregularidad por contact Departamento di Asuntonan Economico na 5212400 of via email: [email protected].

Pa cualkier keho riba tereno di salubridad por contact Departamento di Salud Publico na 5224271 of via facebook page.