PROJECTO IDEA – “Kidspreneurs Bazaar” sigur un exito

Diasabra ultimo a tuma luga e “Kidpreneur$ Bazaar”, den Caya Betico Croes banda di ALDO.
E bazaar aki a wordo organisa door di IDEA y a wordo presenta door di e muchanan cu a participa e aña aki den e projectonan di: “Kidpreneur$ with BIG Ideas” y “Kid$ BIZ Market”.

1. “Kidpreneur$ with BIG Ideas” ta un projecto di 2 aña cu a cuminsa e aña aki 28 februari y lo termina otro aña december 2019.
E projecto aki ta wordo ofreci na tur e 9 traimerdianan na Aruba y ta destina pa e muchanan di 5-de y 6-de klassen cu ta bishitando Traimerdia.

2. “Kid$ BIZ Market”, a tuma luga durante e herfstvakantie (1-5 okt-2018). Y e projecto aki tabata pa muchanan cu no ta bishitando traimerdia. Un totaal di 32 mucha a participa na e projecto aki.

E projectonan aki a ofrece e muchanan educacion empresarial cu lo yudanan reconoce oportunidadnan comercial, door di siñanan con pa gana placa ya for di un edad hopi jong usando nan mesun creatividad. Esaki nan ta hasi door di haya workshop den diferente angulo, manera den arte p.e.: carchi creativo, pintamento riba canvas y con pa crea un areglo musical cu lo por genera placa. Tambe nan a siña con pa traha juice y snacks saludabel/natural. Ademas nan a haya les teoria di finansa y cada mucha a traha nan mes un business plan, di nan negoshi cu nan tin den mente.

Durante e workshopnan nos por a ripara cu cada mucha cu a participa den e projecto aki, tabata hopi satisfecho y a keda motiva pa un dia nan por experiencia den un forma educativo, kico ta pa “ser un comerciante”.

Pa e motibo aki, Iniciativa pa Desaroyo di Empresa Arubano (IDEA) ubica den oficina di Departamento di Asuntonan Economico, Comercio y Industria (DEZHI) a dicidi di organisa un “Kidpreneur$ Bazaar”, pa e muchanan aki.

E traimerdianan cu a participa e aña aki den e bazaar tabata: Traimerdia Dakota, Traimerdia Morgenster, Traimerdia Sabana Basora y Traimerdia O’stad. Otro aña e otro 5 Traimerdianan cu lo jega na turno lo participa den un bazaar similar.

Durante e bazaar aki 25 muchanan a bin hunto como un comerciante ariba nan mes, y a bende diferente productonan manera: cupcake, juice di lamunchi, pinturanan ariba canvas, kuki, mata, pinturanan riba boter, differente decoracionnan di pasco, armband, slime etc. Mas na final di e anochi algun artistanan jong a presenta diferente cantica di pasco y tambe e tur hende presente por a disfruta di e luz nan di Pasco.

Cada mucha presente na e bazaar aki por a experiencia con pa ta un bon comerciante, door di comunica y ta amabel cu cliente y tambe a siña con pa duna nan producto un bon prijs pa asina nan por wordo bendi.

Tur mucha a bende hopi bon, y a bay cas satisfecho cu nan ganashi bon mereci.

IDEA kier a gradici tambe tur su partnersnan manera, SETAR, Elite Promotions & Entertainment, Bureau Traimerdia, Departamento di Cultura, CEDEHM y DOW, pa e evento exitoso aki di: “Kidpreneur$ Bazaar”.

Un danki na tur e pueblo di Aruba cu a bin duna e muchanan aki, cu ta nos futuro, nan aportacion. Y un danki na cada mayor cu a confia den nos, y a sigi guia nan yui pa por a participa den e bazaar aki.

Y por ultimo nos kier a desea tur e muchanan cu a participa den e projecto di “Kidpreneur$ Bazaar” hopi exito.

Abo tin un Idea? Hasi bo Idea realidad. Bishita Idea na Departamento di Asuntonan Economico, Comercio y Industria, na Sun Plaza di dos piso, y nan lo yudabo cu tur informacion y guia necesario.

Scroll To Top