Download APP Control di Prijs

Apreciable cliente,

Departamento di Asuntonan Económico ta recorda cu e APP ‘Control di Prijs’ ta disponibel pa download riba GOOGLE PLAY pa android devices y APP STORE pa apple devices.

Meta di a APP ta pa empodera e consumidor: Na tur momento brinda consumidornan y comerciantenan acceso na e prijsnan maximo stipula pa productonan di canasta basico. Durante compras consumidor por acudi na e APP pa check si e prijsnan den supermercado ta cuadra cu e prijsnan stipula pa gobierno. Asina e consumidor tambe tin un instrumento pa por controla e prijs di productonan di supermercado pa por haci su compras consientemente.

Tambe e APP ta un instrumento pa e comerciantenan keda up-to-date di cambionan di prijs y cumpli cu prijsnan regula pa gobierno.

Banda di prijsnan maximo di canasta basico e APP ta brinda informacion riba:

• prijsnan regula pa productonan petrolero,
• prijsnan regula pa LPG-gas pa consumo domestico di 100 lbs.
• Prijsnan regula pa webo local y importa
• Prijsnan regula pa pan blanco
• Macuto di compras

Stapnan pa download y uzo di e app

1. Pa download e APP ’control di prijs’ Bishita GOOGLE PLAY of APP Store pa download. Google Play pa android devices y  APP store pa  apple devices.
2. Den e bentana di ‘search’ type “control di prijs”
3. Click pa download e app. E app bo ta reconoce na e icon blauw cu descripcion na papiamento.
4. Habri e app
5. Riba e screen parti abow lo encontra e icons basico, search, petrolero, compras y mas. Click riba e icon ‘basico’ y scohe e categoria desea pa por mira prijs di cada producto pa marca y contenido. Click riba un producto specifico pa haya mas informacion di contenido, prijs pa consumidor y prijs pa detayista pa bulto. Si durante compras a nota un prijs di producto cu no ta cuadra cu e prijs stipula, por comparti esaki door di crea un account pa por login y laga bo comentario. DEACI lo atende  e comentarionan ricibi y duna feedback. Pa por crea un account  un email adres personal y un password ta necesario.
6. Si ta en busca di un producto en specifico por click riba e icon ‘search’ y type e producto of marca pa mas informacion
7. Pa prijs vigente di gasoline y gas pa consumo domestico click riba e icon ‘petrolero’. Pa por wak e imagen mas grandi por ‘click pa wak riba nos site”.
8. Pa e ultimo publicacion di macuto di compras, click riba e icon di ‘compras’. Pa wak publicacionnan  bieuw por bishita nos website www.deaci.aw.

Scroll To Top