Departamento di Asunto Economico, Comercio y Industria ta informa referente permiso pa establecimento di negoshi na Aruba

Departamento di Asunto Economico, Comercio y Industria (DEZHI) ta atende entre otro permiso pa Establecimento di Negoshi (Vestigingsverordening Bedrijven).

Ta recorda comerciantenan cu desde mei 2017 te cu mei 2021 tin moratorio riba establecimento relaciona cu benta di e.o. comestibles, conoci como supermarket/minimarket.

Conforme e ley ariba menciona tur negoshi mester tin permiso pa establece y opera un negoshi (nobo), pa muda un negoshi, amplia of cambia actividadnan comercial di un negoshi existente of establece un sucursal di un Sociedad Huridico.

Personanan naci na Aruba, mayor di 18 aña y di nacionalidad Hulandes, al igual personanan cu a naturalisa Hulandes aki na Aruba y cu tin 18 aña of mas di edad, no mester di permiso pa establece un Negoshi Propio of fungi como partner den un Sociedad Colectivo, tampoco pa fungi como director di un Sociedad Huridico (N.V., V.B.A., A.V.V.).

Pa tur otro caso permiso ta rekeri.

Riba nos website www.deaci.aw por haja informacion di e servicionan cu e departamento ta brinda y tambe otro informacionan riba e tereno di economia y comercio en general. Pa loke ta trata e seccion pa permiso pa negoshi (Doing Business/ Business License), clientenan/comerciante por haci un afspraak via nos website ariba menciona, na “Make an Appointment” pa por busca/ricibi informacion, entrega un peticion of pidi copia di un permiso.

Fuera di e Ordenansa Nacional pa Establecimento di Negoshi, tur negoshi tin obligacion pa registra na Camara di Comercio. DEZHI ta constata na momento di control cu tin hopi negoshi, e.o. hotel, condominium, restaurant y otronan, cu no a registra e nomber di negoshi/nomber comercial na Camara di Comercio. Pa evita cu negoshi nan por tin nomber similar y cu por trece confusion den pueblo esaki mester wordo haci.

Pa facilita e control riba cumplimento di e ley en cuestion, tur comerciante ta wordo pidi pa tin na tur momento, den e establecimento corespondiente, e original of copia di e permiso(nan) necesario y/of un extracto di registracion na Camara di Comercio (no mas bieuw cu 6 luna). E documentonan menciona mester wordo mustra na e ambtenaar di Departamento di Asunto Economico unda e control ta tuma lugar.